بلوچ زانتکار ءُ سیاسی سروکاں سارکنت!

پدریں گپے کہ بلوچستان سئے ملکانی تہا بہر کنگ بوتگ ءُ بلوچ راجءِ انسانی لوث انت کہ وتی
ماتین سرزمینءِِ واھند وت بہ بیت۔ اے سالانی تہا کہ مۓ ملک بندیگ کنگ بوتگ، دھانی ھزاربلوچ
سرمچارشھید ءُ سدانی ھزاردگہ لٹ ءُ کٹ کنگ ءُ سیاه ء ُ تهاریں بندیگ جاھانی تہا دؤردیگ بوتگ
انت۔

ایران ءُ پاکستان ءِ بلوچ دژمنیں واکداراں، رسترءِ پیما مئے ملک ءِ مال ء مڈیانی سرا کپتگ انتءُ هرچیزءَ هول ءُ پہ وت ءَ کش ءُ ڈ ل کنگ ءُ برکا انت.

بلوچءِ جہد دیما روان انت، بلۓ انگت پہ آپسرے نہ رستگ۔ چہ روسءِ پرشگ ءَ(۱۹۹۰) رند، بازیں ملک ءِ آزات بوت انت ءُ بازینے ءَ همے امیت بوتگ ات کہ بلوچستان ھم یکے چہ ھمے ملکاں بوتیں۔ بلئے اپسوز کہ مۓ منزل انگت ءَ چوش نزیک گندگ بیگا نہ انت۔

انگریزکہ آ وھداں دنیا ءِ سرا حاکمی کتگ ات، بلوچستانی ٹکرٹکرکت ءُ وتی گلامانءِ درمیانءَ بہرۓ
کت۔ مرچاں امریکا، انگریزءِ جاگہ گپتگ ءُ اقوامءِ متحدهءِ تہا ھم مزنیں جاگہےءِ واهند انت. گوشگ
لوٹیت کہ ھرمزنیں کارے بید چہ آھانی وژنودیءَ بیگی نہ انت۔

لہتے چہ مۓ مزنیں کماش ءُ زانتکاراں، پد چہ ٦٠ـ ٨٠ سالءَ، باید ات کہ بلوچستانءِسیاستءَ پہتگیءِ نیمگا برتیں، بلۓ انگت گندیں کہ وتی گپ ءُ انترویوانی تہا، ھما سیاستءَ دیما برنت کہ مرچیگیں
دؤرءِ سیاست نہ انت۔ انگت یورپءُ امریکاءِ دشمنیءِ سیاست دیما روگنت، چیزے کہ بلوچءِ آزاتیءِ
جہدءَ تاواں دنت۔

بلوچستانءَ، بلوچ راجءُ سرمچارانی جدءُ جہد آزات کت کنت۔ بلۓ پدا دگہ ملکانی کمک ءُ مدت المی گپے کہ جہدءَ تیزترکنت ءُ زوت ترپہ وتی جاگہءَ رسیں ایت۔ روس ءُ چین مۓ ملکءِ آزاتیءِ دیمپاں
انتءُ پہ وتی مالی سوتءُ پائدگ ءِ هاترا هرچیزءَ پادءِ چیرا هلنت.

بلوچءِ آزاتیءِ جہد هما وهدءَ سوبیں بوت کنت کہ وتارا تپاک کنت ءُ دنیاءِ تہا پیش بداریت ءُ بہ منائینیت کہ آئیءَ اے پہتگی ءُ سیاسی تیاری هست انت کہ وتی ملکءِ مسترءُ کستروت بہ بیت۔

پہ بلوچءَ دگہ راھے پشت نہ کپیت بید چہ اش کہ وتا گوں مگربی ملکاںءُ اقوام متحدهءَ نزیک ءُ همگرنچ
بکنت ءُ ایرانءُ پاکستانءِ ظلمءُ زیادتی یانءَ پاشک ء پدربکنت ءُ چہ آھان مدت بلوٹیت۔ بلکں پہ اے کارے دیما برگا سالانی سال بہ لگیت، بلۓ نہ بیگی چیزے نہ انت۔ گوستگیں سالانی تہا اے ردا بازیں جہدے
بوتگ، کہ بس نہ انتءُ شرتریں رھبندےءِ سرا دیما برگ لوٹنت۔

رودرآتکی بلوچستانءِ سیاسی رهدربرءُ سروک اے پڑءَ بازنزورانت. آهاں چوش کہ گندگ بیگا انت، دنیاءَ انگت پاکستان ـ هند ـ اوگانستان ءُ روس گندگا انت ءُ سرپد نہ انت کہ دیما ترا، دگہ مستریں دنیاءِ هم هست انت. ما هرکسءَ را کہ گوں ما نہ انت وتی دشمن مہ زانیںءُ همے کوشش کنیں کہ دشمنءِ سنگتانءَ چہ
آئی ءَ دورءُ پہ وتءَ نزیک کنیں۔

پاکستانءُ ایرانءِ پہریزوک، مگربی ملکءُ امریکا انت. همے ملکاں ایران ءُ پاکستانءَ پروشت هم کننت، وهدے کہ دلجم بہ بنت کہ چدءُ رندءَ آهانی مفاداتءِ سرا دیما نہ رونت۔ گوستگیں سالانی تہا گندگ بوتگ
کہ اے دوئیں ملکاں، وتی واجہانی واھگانی لوٹءِ سرا دیما نہ شتگ انت۔ بوت کنت کہ واجہ کاراں وتی
رهبندانی سرا چارءُ بیچار کننت ءُ بدلی بیارنت. اے گامگیجاں بلوچ تیزترکت کننت۔ گوں ھمے امیتءُ
واهگءَ کہ بلوچ راجءِ سروک ءُ رهدربران گیش چہ گوستگیں سالاں اے پڑءِ سرا دلگوش گورکننت ءُ
بلوچستانءِ آجوئیءِ جہدءَ پہ مادنیں راھے بکشائیں انتءُ دیما برنت.

کريم بلوچ