پھره منى پھراِنت منى

پهره بلوچے پھرءُ شان,پھره منى جدے نشان

پھره  تيى  پھره منى , پهره دِلنت َسر مکُران

پھره منى پھراِنت منى ,ھروھد ِببَاتے جان منى

آباد ءُ سَرزندگ  ِببَے, َدنزے َمگيپت ديما تيى

جورين  بَدانى چم تھار, ھِجبَر مَباتے بى کَرَار

تے حُسنءُ تےزيبايىءَ, دِلترک َبنت چوبارءُبار

ھرکوهءُدشتءَتوبچار,کاھوک بلوچى وش وراک

پُترونکءُدَھلُُُک پيمَلوک,سمسور مگيَر سردرچه حاک

آتے کُنارءُ  پُرک ءُ  داز,کوَنل په گُژنے دارگءَ

ھَنچو کَليرءُ زيرُکاں , ھِنجير مه  کوھانى  گورءَ

جوانين ملوکءُ دلبران, گلپوشءُوَش کَديں گُلان

دست دوچين پوشاکاں گورنت, مزوانک مه لُنٹانءَجنان

بوچَندنء ُمھلب کننت, نازينکء ُصوتءُ ساز کننت

گوں مَلگان گوں لُڈگان, ھوش ءُ سرءَ مے گار کننت

پھره بے کلينک ءَ نبيت, کلينک بے کورءِ کَلکَلى

سوراب ءُ بَگدانى په گور, نِشتَگ په وشءُ وشدلى

پھره  بِگِر  تا  ڈمن ءَ , ھنچو  برو کارواندر ءَ

دشت ءُ دَرَگ کوه ءُ  کمر, ترُپشُک بَليڈى سر درءَ

پھره تا اَبتِر چار کَدَم , آ ديمتِرا سربازءُ راسک

ھرچى که گِندے ره سَران, پُلءُ گل اَنت گوں جَرءُدار

بمپورگوآ کِشتءُکِشار,گندم په يَگوَردرچکءُدار

کوٹِيگ په تامءَجُست مَگِر, په شيرينى کنڈنت به چار

بمپور تيى ھم کوپَگينت , لاشار تيى براتءُ  گُھار

سرباز گون باگ ءُ ميوه گان, روتِنت تا گنجين چابھار

حرما مضاپتى وشترين, لاشارزمين مَٹءَ وتِں

اِسپکه  مِسکوتان بِگِر , پَنوچ ءُ چامپ ءَ وڑ وڑيں

کوپچے اگرنامءَ گِرے ,آ وت په وت راج دَپترن

ھَنگََت پَمے  لاشار زمين , روژنے سُپاھِن  شرتِرن

بزمان گوآميرين بلوچ,ھم کوپَگءُھم براتءُدوست

دلگانءُ گزّھکءُ تنھک ,ھروھد بلوچے يارءُ اوست

پھرِِنت منءَ پرکوم ءُ برات,ھرنيمگا چارے بچار

پھره  زمين  وشدل  ببات , آباد ببات ھم بارءُ  بار

آ پهره اى نامى کلات , دوست محمد ءِ جاهءُجلال

ھنگت بلوچے کَھرءُ پھر,منتگ پما کرنے په سال

پهره په غيب الله سلام , ھروھد تيى يادا کپاں

تے کِسَيا ن تے وشگپا ن , ھنگت پما نام ءُ دپاں

شعرءُ توارءُ زيملان , رمضان وتى مٹ ء ُکرار

اپسوز په اے کمين زمان , گِپتى چه ما آ وش توار

جانوک ڈھُلى آ کُجين, پَرام په پَرام ڈھل بِِجنت

سورناءُ سازان چَھربوارت, سےچاپىءِ ناچ ءَ بکنت

شھرے کُليان وشگوشين,پيرل گوصاحبدادےياد

نازينک ءُ صوتءُ ليکوان , ماشاالله ءِ شَرين  توار

شاعر نويسوک ع- بلوچ ,آدينَگ ءِ تِچکين کلام

ھم په وتى وس ءُ توان , نويسيتءُجنت گوانکءَ مدام

جورين جواب ءُ پَسيان , گُل ميح کنتين دولتان

ھوشنگ الُس ءِ آ قلم , شمشير ءَ   کنت ھم  کُنتان

پهره زمين رَنِجت مبات, کوران ببيت کُربان ترا

په گيشرءُ لانٹيگ تيى , جور ءُ  کَرَگ بَستَگ سرا

کوران  دامنى  ۲۷-۱۲-۸۵

­++++++++++++++++++++++++++++++++++++++++++++++++++++++++++

واجھانے که ھنون مے درميانءَ نھنت,;مگر آيانى ياد,زحمت ءُ محنت په بلوچستان ءُ پهرهءَ ٹيکے اِت که ھجبر يادان نروت.

غيب الله کشاورز= يکے چه سرحالترين,وشگپترين وزحمتکش ترين ,باشنده پھره  بوتگ, که ھروھد نااميتين مردمانءَ ,آگے گپ ءُ حبرءُ کرداراميدوارکرتگ.غيب الله يکے چه بھترين شکست بندان پهره زمين ھم ھستت.

رمضان کشاورز= يکے چه بھترين ,وش گٹ ترين پهره اى آواز وان ات ,که تا نود سالگى ءَ ھم  آوازى وانت .

جانوک ڈھُلى=جان محمدءِ ڈھلے توار بے تھمبلين مردمءَھم په ناچءَ چست کتگ,وتا ھنون ھيچ ڈھلى اے په آگے حدءَ نپُجِته.                  

پيرل ءُ صاحبداد = صاحبداد , پيرل ءِ عارفين پيتنت ,که اے پت ءُ چوک نزديک به کرنے په بلوچستان ساز جت ءُ آواز وانت.