وطن
وطن چو آس بُن گپتگ مروچى
مه ھرگورکُشتءُ کشتارانت مروچى
وطن ھرنيمگءَ ميٸ واهءُ زارانت
چيا چوکَپءُ چنڈءُ گارءُ وارانت ؟
وطن ميٸ غيرتءُراهءِ شھيداں
وطن پرياتءُ نالگ چه غريباں
وطن مرچى تَراگوانکءُ توارانت
وطن آزاتىءِ سَک چمءُ چارانت
وطن جانءُ وطن عمرءُ وطن ساه
وطن استاروطن روچءُ وطن ماه
وطن فاضل وطن سيدھاشمي انت
وطن قاضى وطن گل خان نصيرانت
وطن ملا کمال ھان انت گوں آواز
وطن نورل وطن فيض محمدے ساز
وطن سيدھاشمى انت گوں سيد گنج
زُبانى زندگ داشتگ گوں ھزار رنج
وطن گل خان نصيرانت گوں گرندءَ
وطن شعرءُ وطن کوکار جنگ ءُ
وطن غوس بخش وطن اکبربوگٹى انت
وطن جماخان ءُ شيرو مرى انت
وطن ميرکمبرءُ دادشاھے جنگ انت
وطن ميرين رحيم زردکوهءِ ھند انت
وطن خانءِکلات ءُ دوستمحمد خاں
وطن ميرحملے جنگ گون فرنگاں
وطن گوھرام وطن چاکرء رندانت
وطن ھانىءُ شيح ءِ گِندءُ نند انت
وطن چابھاروطن گوادر گوں پنجگور
وطن نيمروز وطن پھره گوں بمپور
وطن شال ءُ وطن دزآپءُ لاشار
وطن واش ءُ وطن شستونءُ آشار
وطن سربازى کورءُ سدءُ بند انت
وطن ماشکيد بِگِرمينابى ھَندانت
وطن سرحد وطن ايرندگان انت
وطن بزمان وطن کلپورگان انت
وطن چاغى وطن خارانءُ کيچ انت
وطن تُربت بگر تاں آسپيچ انت
وطن کوهلوا تاں بندر گُمبدان انت
وطن سيستانءُجاشکءُ آواران انت
وطن ميرجاوه ءُ تپتان گوں تپت انت
وطن سِِبى ءُ پيشين تاسَرخس انت
وطن ميٸ زِر مزں ناميں گوں ھولاں
وطن سازءُ سرود ءُ گوں ڈھولاں
وطن مچ ءُ وطن کوکورءُ حرما
وطن ھامينے وھدءُ ڈھل ءُ سرنا
وطن دوستى وطن مھرءُ محبت
وطن يکجاھى ءُ ميٸ زورءُ طاقت
وطن سرناىءُ سازءُ ملگاں ميٸ
وطن گرد چھرءُ وطن سے چاپى ياں ميٸ
وطن رازءُ نيازءُ ھستى انت ميٸ
وطن جدے نشانءُ پيروک انت ميٸ
وطن مات انت ءُ مھرے دامُن انت ميٸ
وطن براتءُ گوھارءُ عزت انت ميٸ
وطن ليب جاهءُ چوکى جاگه انت ميٸ
وطن لج ءُ ميار ءُ غيرت انت ميٸ
وطن ميٸ ھستءُ نيست ءُ زندگانى
وطن ميٸ کودکى ءُ ميٸ جوانى
وطن ھرچيز که ھست انت سک عزيزانت
وطن سبزءُ ياں ھشکيں دار ببيت انت
وطن کوران چه ھر ڈنے گوزيت انت
ھزاررند ڈنءَ چُک ايت پلپڑيت انت
کوران دامنى
آبان ۸۶
http://balochddieh.blogspot.com/
