دلگوش:

من یکے چه بلوچستانءِ راجی زرمبشے دوزواهان هستون ءُ منی مقصد چه اے نبشتانکءَ ایرانے  پروشگ (تجزیه) نه انت بلکین آ زلم ءُ زورے که ایرانے گوستگین ءُ هنوگین واکان په مئے بزگین ءُ بے وسین راجے سرءَ کتگ و  انگت کنگا اّنت په وتی کمین زانتءَ مان اے گونڈین وچپءُ چوٹین نبشتانکءَ شمئے هذمتءَ پیش کنان. اِے سرپ منی پکر نه انت بلکین اگن سجئین گوشگ نبیت بلئے گِشترین بلوچانی پکر انت۔ ءُ منی دزبندی چه زرمبشے سنگتان اش انت  که آ یک بلوچ مچی ءَ اتحادیءِ جارءَ بجن انت بلوچ راجے تنظیم ءُ پارٹیانءَ یک جاه بکنت . چوش که من سرپدان اشانی( بلوچ مهلوکےکه مان یوروپءَ نندوک انت )مقصد ءُ مراد اش بلوچ راجے حقانی گرگ انت.بلوچ راجے وشهالینت ءُ بلوچ راجءَ چه اے مصیبتان ءُ ازابیانے درایگ انت.

سرون گــــــــون هزار دیـــــگءَ شوشتگ

    نُبیسوک: سگاری

۲۸ مهر۱۳۸۶ 

    چنت وهد انت که ایرانءِ سرا اُروش کنگ چه ڈنی ملکانے نیمگءَ (امریکه ءُ ائیےءِ اتحادی ملکان)مان بلوچی مهپلانی تها چوش که تنورے پیما گرم انت. لهتے اے اُروشے منّوک انت و لهتے نمّنوک.

منی هیالا امریکه په ما بلوچ مهلوکءَ چه ایرانے اسلامی رژیمے هون وارین ، پلیتین و نا انساپ پسندین هکومتءَ هراب تر نه انت بلکے گهتر بوت کنت.

امریکه وتی کوما مُپت ءُ ناهک گون چیلـیک ءَ پاهو ندنت . وتی کلــــــــــگ و میتگانءَ گون ٹانک و ٹوپ،گون هلیکپتر و اے دگـــــــــــــــــه مردم کُشیــــــن سلاحان  بمبار نکنت.امریکه منی ءُ تئے مذهبءَ(توهین نکنت) بدءُرد نه گوشیت.

اگن آمریکه ایرانے سرءَ  آُروش ببارت گڑا بلوچستانے گزرانی، اجتماعی و سیاسی حالت  چه هنوگین حالتءَ باز گهتر بیت. اگن هن نفـــــــــتءَ ببارت چنت درصدے مارا بهر بیت . عراقءِ کردستانءَ بچار اینچو گزرانی ءُ اجتماعی کار که هنو بوتگ  و بوئگا انت عراقے گوستگین حکومتانے دورءُ باریگءَ نبوتگ.ایران میلیاردانی حسابءَ دلار جزب الله و حماسءَدنت بلئے اپسوز و هزار ارمان بلوچ راجے هنوگین نگیگین حالت ءَ بچار. گون لٹ و کٹءَ په زور منینگءُ بلوچ راج ءُمهلوکءَرا مان وتی ترسناکینءُ بیمناکین بندیگجاهان بندیگ کنگ،بیے وسین مردمانی لوگانا بمبار کنگ ءُ پروشگ. مکی مسیتءَ گون هلیکو پتر ءُ آر.پی.جی بمبار کنگ.کسان سالین بلوچ راجے دهتگ  رویا سارانی ءَ گون وتی کشندئین سلاحان شهید کنگ، کسان سالین بلوچ راجے پسّگ  سعید قنبرزهیے ءَ گون چیلوک پاهو دیگ۔ البت من اشیی ‏ءِ سرا تپاک کنان که جنگءَ وشی مان نیست. آس که کپیت گڑا تّرءُ هُشک نزانت.

تئی بلوچستانے حالت  هنچوش که  بغداد ے حالت انت. ادان سکون نیست بلئے بغدادے پرک گون بلوچستانءَ اش انت که بغدادے هبر هما روچ ءُ هما ساهتءَ ڈّنا شنگ بیت. بلئے بلوچستانے هبر ڈّنا نروت چیا که ادان ڈنی هبردیوک نیست. 

 ( واجهان اے هما هرّک جُڈالے کسهه انت.هر کس که آهانے گپءَ ممنیت ا باید انت که گار‏ءُ گُمسار کنگ ببیت).

ایرانے اسلامی رژیمے سلاح بندین فوج  چوش که زدگیـن مارے هر کجا که رسیت ڈنــگ جنت.

‏

جی هو، اتم بمبــــــــــــے اڈ کنگ په هورین راجانی ملکان چوش که ایران و پاکستانءَ باز هترناک انت .

اے بابتءَ ایرانے اسلامی رجیم ملیاردانی ملیارد زر په اتم بمبءِ اڈ کنگءَ حرج کتگ.

اتم  بمبے اڈ کنگ راحت انت .بلے دارگی باز سهت انت .چیا که اگن یک کمین تکنیکی حادثهءِ پیش بئیت  یان که په کومیے سرءَ استعمال کنگ ببیت (که چه إشان هچ شکّے نیست). گڑا آ ملک و ادگه همساهگین ملکان هن چه اے مسیبتءَ نه رک انت.اے ملکانے زندگین مردم (اگن کسی زندگ ببیت )گڑا نسلانی نسل تاوان گندنت.ایرانے هونواین رژیم چه گوستگین شورویءَ دیما تر نه انت بلکین سک باز پشتاتر بوت کنت.

بچارین چرنوبیلءَ چے بیت؟ چرنوبیلے ترکگا رند سدانی هساب ءَ مردم بیران بوت. اے حادثهءَ 20سالءَ چه گش گوستگ، بلئے انگت که انگت انت انت اودےمهلوک وڑوڑین بیماریانی آماج انت و هنچوش کرءُ گوری ملکانے مهلوک اے بابتءَ تاوان دستگ  و انگت هن تاوان گندگاانت.

گون اے پهکین زلم و زورانے که مان مئے  بزگین و بے وسین راجے سرا بوهگاانت و انگت ڈنی یروشے نمنوک انت گڑا بزان اے پکرے واهند چه بلوٹ انت یان ملوٹ انت، هونوارین ایرانے اسلامی رژیمے دوزواه انت.

من چه بلوچ راجے زانوگرانءُ کواسان دزبندی کنان که په اے اڑ وجنجالانے ولگوج کنگءِ هاترا وتی توارءَ یکے کن ات ءُ هنچوش هور گون یک ءُ دگرءَ مچی ءُ تپاکیءِ مهر ءُکشارانءَ آپ بدئیت.

بلوچان گوشتگ: سرون گون هزار دیگءَ شوشتگ ایشی ءِ معنا اش انت که صبر و اوپار بس انت.

 Posted:20071021