بلوچ راجءِ سـٹـراٹـجـی جهـانءِ توکا
هـ . س . براهويی (الس پهره ای)
ــــــــــــــــــــــــــــــــــــــــــــــ
په درستين بلوچ زانتکار ءُ سماگر پـدّرانت که
مروچين بلوچ راجءِ بزگیءِ سـوب هما اِنت که بلوچ راجءِ آيوکين
وشـبـهـتی ءُ وشنامی گوشگ بيت! بلوچستان چـءَ جيوگرافی، سـٹراٹـجی
ءُ اکونومی گندا چـءَ گوستگين کرن تا هنونين درگتان درستين جهانءِ
کـمـپـنـيان، هکومتان ءُ يونايـٹـڈ نـيـشـنـا هَـبَـکّـهءِ توکا
اير داشتگ.
په ما پدّراِنت که آزاتين ملکانءِ هکومتانا، آهانی
باپاری کمپنيان داشتگ اَنت ءُ هکومتانی تؤکی ءُ ڈنـی رابطه ءُ
هنچوش آهانی واک چـءَ کمپنيانی نيمگا تـيار بـيگائنت. جهانءِ توکا
هرجاگهی که کمپنی باپار بکنت، هکومتءِ ديم هم هما نيمگا ترايت. آ
ملکان که کم ءُ گيش ڈيموکراسـيـا کارمرز کنـنـت، تلاشـش ايـشنـت که
وتی مردم ءُ کمپنيانی واکا يک اندازگا بـيـلـنـس (بالانس) بديـنت.
چيا که کمپنی ايوک کلدارءِ پدااِنت؛ ءُ مردم ڈيموکراسی ءُ کارءِ
پدا.
کدی بوت کنت همے مردم که کمپنيانی توکا په کار
ءُ روزگار گولائيش اَنت، چـءَ اے سوب که کاراش چـءَ دستش مروت،
مجبور بنت کمپنيانی سياست ءُ هبرا بمن اَنت ءُ ڈيموکراسیءِ
رهبندانا لهتيےجاهان مچاراَنت.
درور جهانءِ هزاران کمپنی گؤن پارسی، پنجابی ءُ
خليجی عربان باپار کنگااَنت. که پيشگين کرن اے باپاریا گؤن آهان
بنگيج کرتگ اَنت ءُ هنگـت هم باپاریءِ واک ءُ ردؤم گون هماوان
اِنت. چـءَ دگه نيمگی سندی، بلوچ، پـٹان، کورد، احوازی ... چـءَ
باپاری ءُ واک زبـهـراَنت. بازين مردمی که يورپ، جاپان، امريکا،
روس، اينڈيا ءُ چايناءِ کمپنيانءِ توکا کار کنگااَنت، زاننت که
پارسان، پنجاپيان ءُ خليجی عربان آ زبهر بوتگين راجانی اؤبال ءُ
حکـّا ورگااَنت. چـءَ اے چمشانکا آهان اگن ڈيموکراسیءِ رهبندانا
کارمرز بکن اَنت، گـڈا آهانی کمپنيان اوشتنت ءُ وت بےکار ءُ
روزگار بنت.
بےشک پـّدراِنت که " پاکستان"، "ايران" ءُ خليجءِ
عربی ملکان گوستگين کرنءِ توکا گؤن مگربی هکومتان ءُ کمپنيانءِ
واهگان جوڑ بوتگ اَنت. مروچی اے کمپنيانا بايد انت که چـءَ يک
جاگهی درآمد ءُ درکپتی به بيت دانکه زبهر بوتگين ملکانءِ ڈيموکراسی
ءُ هيومن رايتءِ هيالداريا هم بکن اَنت. چه دگه گوَری مزنين
ملکانءِ کمپوٹيشن (رقابت) هم گندگ لؤٹـيـت. بلوچستانءِ باروا اولی
چمشانک ايشـنت که اگن چايناءِ پاد اودان برسـيت، نه تهنا خليج
عربانی شريداری گؤن دنياءِ کمپنيان نزور بيت، بلکين آمريکا، يورپ،
هندوستان، جاپان، روس ءُ درستين عربی ملکانءِ کمپنيان اگن گارءُ
زيان نه بنت بلے زرور سرين پرؤش بنت. چيا که ـ چايناءِ ارزان ءُ
ميانی کواليٹی ميٹريال(ماتريال) درستين بازارا چکاپيت. ـ چايناءِ
ٹرانسـپورٹ بزان مختلفين آپی ءُ هـوايی جهازان اے دگه ملکانی آپی
ءُ هوايی ٹرانسـپورٹانا واپينـيـت. ـ چاينا چـءَ اے دگه ملکان
کاروالا کمتر کارمرز کنت چيا که وتا مردم باز هست.
دويمی چمشانک ايشنـت که هر رؤچ انسانءِ زانت ديما
روگااِنت ءُ بلوچ راج هم چؤش که خليجی عربان ءُ اے دگه جهانءِ مردم
چـءَ وتی هکّ ءُ انسانی اؤبالان بايد اِنت بـهـر بزوريت. چـءَ دگه
نيمگی اے دگه ملکان تان کدی چوش که مروچی بلوچ راجا جيل ءُ
ناسرپدیءِ توکا ءُ دور چه مـيـڈيا تواننت بدارانت؟ آمريکا، يورپ
ءُ خليجی عربان تان کدی اے وتی بد نامیءِ ديما داشت کننت که بلوچ
راج په آهانی زيادتی وشيانءِ هاترا ڈيـه ءُ شُـديک اَنت؟ تان کدی
خليجی عربان اسلام آباد ءُ تهرانءِ هکومتانا کمک دات کن انت که چه
بلوچانی آزاتی ديمگيری بکن انت؟ تان کدی بلوچانا مان وتی ملکان
چوشکه بزگين کاری ءُ سپاهی کارمرز کت کن انت يا دلگوش دارنت؟
رؤچيے نه رؤچيے اے ڈيکـٹاٹوریءُ سياسی ريپانءِ باريگ کُـٹ اَنت.
پميشکا زرور جهانءِ ملکانا چارگی درگيجگ لؤٹـيـت.
منی هيالا مگربی ءُ خليجی ملکان په انسانی ءُ
"سياسی" وڑ ءُ رهبندی شرتراِنت گؤن بلوچ راج نزديک به بنت ءُ ميڈل
ايسٹءِ جاورانی باروا مذاکره بکن اَنت. په عربان ءُ يورپی ملکان
پکا پـّدراِنت که بلوچان شرين ءُ انصافدارين مردم انت ءُ گؤن هر
چؤنين انسانی رهبند ءُ باپاری هشر کن انت.
مروچی نه ايوکا په خليجی عربان بلکين په دنيا پـّدر
بوتگ که درستين تروريستی آشوبانی بُن زه اسلام آباد ءُ تهران
اَنت.
کامـنـٹ: مگربی ملکانءُ يونايـٹـڈ نيشنءِ اداره په
يک انٹرنيشنل باپاری رهبندی گؤن چاينا مذاکره بکن انت. خليجی عربان
بلوچانی اؤبال ءُ آزاتيا بمن انت ءُ پـءَ دراجين وهدءِ دؤستی گون
بلوچان که تا هنون آهانی نزديکين دؤست بوتگ اَنت، مـڑاهداری بکن
انت. درستين اے ملکان هکين هبرا جارءُ پدر بکن انت که انگريزءِ
جوڑ کتگين "ايران" ءُ "پاکستان" ءِ وهد آسر بوتگ ءُ آهانی زيان کنگ
ءُ شموشگءِ وهد انت. پدراِنت که "ايران" ءُ "پاکستان" صرف انگريز
ءُ مگربی ملکانی نپ ءُ سـيـت بوتگ. "پاکستان" ءُ " ايران" بغير
چـءَ پارسی ءُ پنجابی، هچ کسءِ ملک نبوتگ انت بلکين اے دگه ملکانی
زالمين دشمن هم بوتگ انت ءُ کرنی انت که بازين راجيا چوشکه بلوچ،
سندی، پختون، کورد، احوازی عرب، آذری... بزگیءِ توکا داشتگ اَنت.
اگان گون انسانی مارگی گـِنـدگ به بيت، چه برزا اوشتاتگين
چمشانکانی سوب ءُ دگه بازين ڈاکومـنـٹيـے گوشگ لوٹـيـت که مروچی
بلوچ راجءِ اؤبال چير ديگ نه بيت. پيش چه هر ملکی يورپ، آمريکا ءُ
خليجءِ عربی ملکان که بلوچ راجءِ بزگيانءِ سوب اَنت، بايداِنت اے
سرکـُــٹ بوتگين راجءِ هيالداريا بکن اَنت.
16 ـ 04 ـ 2006
Regards
H.S.Braahui (ulus pahrai)
